ՀՀ կրթության, գիտության, մշակույթի և սպորտի նախարարությունը կնախաձեռնի առանձին քննություն՝ կապված Արագածոտնի մարզի կրթական հաստատություններում քարոզարշավին մասնակցության գրանցված դեպքերի հետ։
Այս որոշումը կայացվել է այսօր Ապարանում տեղի ունեցած իրադարձությունների ֆոնին, որտեղ «Քաղաքացիական պայմանագիր» կուսակցության քարոզարշավին մասնակցում էին մարզի գյուղերի դպրոցների ուսուցիչներ և աշակերտներ։
Նախարարությունը հայտնում է, որ քարոզարշավի մեկնարկից ի վեր ստացել է բազմաթիվ ահազանգեր՝ աշխատակազմի, ուսուցիչների և աշակերտների կողմից։ Դրանք վերաբերում են աշխատանքային ժամերին և դասերի ընթացքում քարոզարշավին մասնակցելու դեպքերի։
Օրինակ է բերվում այսօր գրանցված մի դեպք, երբ Արագած և Քուչակ գյուղերի դպրոցների մի շարք ուսուցիչներ և աշակերտներ աշխատանքային ժամերին մասնակցել են քարոզարշավի։
Նախարարությունը հստակեցնում է, որ կնախաձեռնի քննություն՝ պարզելու դեպքի մանրամասները և կիրառելու օրենքով սահմանված հետևանքները՝ համապատասխան լիազոր մարմնի հետ համատեղ։ Բոլոր ահազանգերը նույնպես ուղարկվում են իրավապահ մարմիններին՝ հետագա քննությունների համար։
Նախարարությունը նաև շեշտում է, որ նմանատիպ ցանկացած դրսևորում արժանանալու է պատշաճ արձագանքի և կունենա իրավական հետևանքներ։
Հիշեցնենք, որ մայիսի 6-ին ՀՀ ԿԳՄՍ նախարար Ժաննա Անդրեասյանն Ազգային ժողովում հայտարարել էր, որ եթե ՀՀ կրթական հաստատություններում բացահայտվեն նախընտրական քարոզչության դեպքեր, օրենքի ամբողջ խստությամբ կկիրառվի պատիժ, որը կարող է ընդհուպ մինչև աշխատանքից ազատումներ և մանկավարժական գործունեության իրավունքից զրկվելու դեպքեր հասնել։
